«Հրապարակ»-ը գրում է. «ԱԱԽ նիստից հետո, երեկ, ՀՀԿ գրասենյակի միջանցքներում բազմազանություն էր` մի ուրիշ ձեւի: Մի մասը` հիմնականում «քյարթ»-չեկիստական գործերից հասկացողները, պնդում էին, որ ԱԱԽ նիստն ըստ ամենայնի վերաբերել է առաջիկայում սպասվելիք Սարգսյան-Ալիեւ հանդիպմանը: Մյուս «քյարթ», սակայն գեոպոլիտիկայից չհասկացող` մարզերի հետ սերտ կապեր ունեցող ՀՀԿ-ականներն էլ գտնում էին, որ զինդատախազ Գեւորգ Կոստանյանը ճիշտ է ասել, թե Լիսկան դեպքին ներկա չի եղել. «Խմած-քնած է եղել. ինքը խմել չի կարում, կինը չի ցանկացել հանի, վախեցել է, բայց արի տես, որ ավելի վատ է եղել»:
ՀՀԿ «լիբերալ» թեւն էլ գտնում էր, որ Սուրեն Խաչատրյանն ընդունել է, որ ինքը սխալ է արել, գրել է` ինքը դադարեցնում է իր լիազորությունները մինչեւ գործի քննության ավարտ, երբ օրենքը նման բան չի նախատեսում: Այս թեւն էլ պնդում էր, որ նա արդեն հրաժարականի դիմում է գրել «վերադասին»` տարածքային կառավարման նախարար Արմեն Գեւորգյանին, եւ իբր այսօր այն կհնչեցվի կառավարության նիստում: Սակայն կառավարության մեր աղբյուրները չհաստատեցին այդ լուրը՝ խորհուրդ տալով սպասել»:
